Pidato Bahasa Bali

 

Om Swastyastu,

Sane murdayang titiang bapak  Perbekel Desa Ababi..

Sane wangiang titiang Team Angga Dewan Juri.....

Asapunika taler ida dane sareng sami sane dahat suksemayang tur tresna sihin titiang.

Angayubagia uningayang titiang majeng ring Ida Sang Hyang Widhi Wasa, duaning majanten saking asung kerta wara nugraha Ida mawinang titiang prasida pacang matur samatra nganinin indik " Pangrumrum Jasa Pahlawan"

Sue sampun  jagat nusantara mahardika, angob tur kelangen rasa ngantenang,  kaluihan dipanegara  puniki sampun  dahat becik pisan ngemanggihin makudang kudang kemajuan nyantos iraga nenten prasida keni antuk nulad pemargi kemajuan jaman kadi mangkin, napi malih sane jagi rauh ring kepungkur wekas. Majalaran kamardikaan puniki pinaka dasar anggen nincapang rasa kasuksman ring para pahlawan sane sampun mebela pati nindihin jagat nusantara, sepisanan pangrumrum kaluihan kewirangan jasa pahlawan sami.

Ring tepengan becik puniki ngiring eling-elingn malih jasa pahlawan sami sane sampun ngawinang jagat nusantara puniki mahardika, jaya ring pasengketan, sane sampun sida ngawinang titiang ping kalih ida dane sareng sami prasida mapupul ring genah becik sekadi mangkin, inggih punika ngiring jayawijaya kamardikaan puniki anggen cihna nundunin rasa wirang sayaga ngelanturang turmaning nincapang kamahardikan puniki antuk nyaga kerajegan katreptian jagat nusantara puniki.

 Ida dane sareng sami, ring rahina mangkin  iriki kalaksanayang parikrama  bulan bung karno , dumogi sangkaning parikrama  puniki presida raris nanginin rasa semangat patriotisme pahlawan katulad ring  para warga sejebag jagat Indonesia pamekas oleh para yowana ne sami, Napi ke mawinan wenten pengaptin titiang kadi asapunika" duaning parikrama  puniki madwe kasuksman sane becik pisan inggih punika  mawit iraga presida pacang uning tur eling ring jasa para pahlawan punika. Raris yening sampun setata eling ring jasa para pahlawan, pastika sampun iraga nenten pacang ngusak dipanegara puniki, patutnya ne setata miara nusantara sane sampun mahardika puniki antuk ngemargiang wewangunan ring sakwehing wewidangan jagat  nusantara puniki.

Inggih Ida Dane sareng sami, ring sajeroning wanti warsa perayaan Bulan Bakti Bung Karno puniki, matu eling kawentenan mahardika puniki  sampun jagi 78 warsa sane jagi rauh, punika wantah sangkaning perjuangan pahlawan-pahlawan sane kalintang ksatria nindihin negara saking kaum penjajah, raris ring galah sane mangkin majeng ring para yowana utawi generasi muda, mangda prasida nyikiang pikayunan maparilaksana , mangde prasida ngelanturang tetujon jagat nusantara , ngelanturang wangunan ring sukawening wewidangan, mawinan ring sajeroning pakeling bulan bakti bung karno pinaka cihna pangeling -eling, sutindih tur ngawerdiang rasa wirang ring para pahlawan, mawastu mangda jaya kawijayaan kesatuan jagat nusantara  sayan-sayan nincap.

Inggih wantah asapunika daging pidarta titiang, yening wenten kirang langkung, mawali titiang ngelungsur pangampura dahat, make panguntat atur,sineb titiang antuk parama santhi

“Om Shanti Shanti Shanti Om”